Улаанбаатар хотын нийгэм, эдийн засгийн хөгжилд шинэ жишиг авчирсан, дэлхийн стандартад хүрсэн шилдэг бүтээн байгуулалтад олгох “Нийслэлийн бүтээн байгуулалтын дээд шагнал”-ын эзнээр залуусын “Вива Сити” хороолол тодорлоо. Нийслэлийн өдрөөр буюу аравдугаар сарын 29-нийг тохиолдуулан зохион байгуулсан энэхүү шалгаруулалт “Барилга байгууламж”, “Дэвшилтэт техник, технологи”, “Дэд бүтэц, инженерийн байгууламж”, “Автозам, замын байгууламжийн бүтээн байгуулалт” гэсэн дөрвөн төрөлд зохиогдсон бөгөөд “Вива Сити” хороолол хоёр төрөлд нэр дэвшиж шилдэг “Барилга, байгууламж”-ид тэргүүлсэн юм. Мөн энэ үеэр нийслэлчүүдийнхээ ая тухтай амьдрах нөхцөлийг бүрдүүлж,  Улаанбаатар хотын бүтээн байгуулалтанд онцгой хувь нэмэр оруулсныг үнэлж М-Си-Эс Группын ерөнхийлөгч Ж.Одод нийслэлийн дээд шагнал “Хангарьд” одонг гардуулав.

Нийслэлийн Засаг Даргын Тамгын Газар, Захирагчийн ажлын алба, Ерөнхий төлөвлөгөөний газар, Мэргэжлийн хяналтын газар, Зураг төслийн хүрээлэн, эрдэм шинжилгээ судалгааны төрийн бус байгууллага, мэргэжлийн холбоод, иргэдийн төлөөллөөс бүрдсэн ажлын хэсэг болон олон нийтээс ирсэн саналыг үндэслэн тодруулсан энэхүү шалгаруулалтанд нийт 21 бүтээн байгуулалт нэр дэвшсэн байна. Шилдгээр шалгарсан бүтээлүүд нь 2013 онд шинээр ашиглалтанд орсон, үр дүн нь ард иргэдэд шууд хүрсэн, тухайн бүтээн байгуулалт нь нийслэлийнхний аж амьдралд онцгой нөлөө үзүүлсэн, дэлхийн түвшний стандартыг нэвтрүүлсэн гэх мэт олон талт шалгуур үзүүлэлтийг хангасан гэж зохион байгуулагчид тодорхойлжээ. “Нийслэлийн шилдэг бүтээн байгуулалт” шалгаруулалт цаашид жил бүрийн “Нийслэлийн өдөр”-өөр уламжлал болгон зохион байгуулагдах аж.